Quen somos e que pretendemos

OUTROS MUNDOS PARA-LELOS
CLUBE DE LECTURA


E logo vós, os dese Clube de lectura, de quen vides sendo?
Iso, de quen vimos sendo? Pois do Eduardo Pondal, o noso Instituto. Somos un grupo que desexamos fomentar a lectura, animarvos a que leades máis. Porque queremos vivir outras vidas e vivir outros mundos en que as historias nos introducen: novos mundos paralelos para lelos, mundos que podemos ler, recrear e soñar...

E cando nos habemos reunir?
Os venres de todas as semanas no segundo recreo. Estaremos no Departamento de Lingua e Literatura Galega, no primeiro andar do Instituto.

E quen pode formar parte do clube de lectura?
Toda as persoas da comunidade escolar do IES Pondal (alumnos e alumnas da ESO, de BAC, profes, pais, nais, persoal non docente...), quen queira coñecer novos libros, quen queira recomendar todo o que se poida ler (bandas deseñadas, novelas policiais, de aventuras, do que sexa....) poden participar no noso clube.

E de que che vai valer a ti este clube?
Podemos intercambiar libros de lectura, pedilos emprestados ou deixar os nosos... Podes levalos a casa para os ler... pagando un módico prezo, iso si: logo de acabares o libro, hai que dar, na reunión seguinte, a túa opinión sobre el... Hai xa varios exemplares de “Harry Potter e as reliquias da morte”. Tamén podes suxerir que libros vos apetecería que comprásemos.

E como nos comunicaremos coa comunidade educativa?
Todos os meses publicaremos un Boletín con novidades e con opinións. Á parte temos un blog onde cadaquén pode publicar as súas recomendacións e propoñer novas ideas.

E que cómpre facer para acceder ao blog de “Outros mundos para-lelos”?
Doado: vas á páxina www.ies.eduardo.pondal e premes na ligazón Mundos para-lelos. Ah! E non esquezades ler o blog da biblioteca... Lembra que en cada aula hai un ordenador desde o que se accede a estes blogs.

Que teño que facer se quero colaborar coas miñas opinións no Boletín ou no blog?
Moi fácil, os venres no segundo recreo achégaste ao Departamento de Lingua e Literatura Galega e entregas as túas opinións. Podes traer caricaturas, debuxos, pasatempos, contos... e o que se che ocorra.

E de que seccións fixas constará este Boletín?
1.- O libro do mes
2.- Reseñas
3.- Recomendamos (EI, EP, ESO, BAC, Maiores)
4.- Mulleres na literatura galega
5.- Visita por librarías e bibliotecas de Compostela e bisbarra
6.- Bandas deseñadas
7.- O noso blog
8.- Colaboracións varias (concursos, debuxos, pasatempos, etc...)